Gi-desisyonan sa Malaybalay City Water District (MCWD) ang pagtapos sa kontrata niini sa PrimeWater tungod sa kapakyasan sa serbisyo sa panubig sa Dakbayan sa Malaybalay.
Sa pakighinabi sa Bombo Radyo Malaybalay kay Engr. Nolito S. Binahon, General Manager, sa Malaybalay City Water District na matod pa gihimo ang desisyon sa MCWD Board of Directors atol sa ilang miting niadtong milabayng adlaw, human mapaso ang 90 ka adlaw nga extension nga gihatag sa PrimeWater aron matubag ang mga reklamo sa mga konsumidor.
Matud ni Binahon, bisan nakapadala og sulat ang kompanya, wala kini nakahatag og klaro ug epektibong solusyon sa mga isyu sa suplay ug serbisyo sa tubig. Sa pagkakaron, “terminated in principle” pa ang kontrata samtang gitapos sa MCWD ang opisyal nga dokumento ug pahayag nga ipahibalo sa PrimeWater ug ubang may kalabutan nga partido.
Sa proseso, magpadayon gihapon ang PrimeWater sa adlaw-adlaw nga operasyon ug koleksyon hangtod mahuman ang pormal nga turnover ug masuta ang ilang giingong mga puhunan sulod sa miaging lima ka tuig.
Gipangandaman sa Malaybalay City Water District ang sunod nga mga lakang aron masiguro ang hapsay nga pagbalhin sa operasyon ug malikayan ang teknikal nga kalisdanan, samtang gilauman nga ipagawas ang opisyal nga termination document sa labing dali nga panahon human sa holiday season.