Gibasol karon sa pipila ka mga mamaligyaay sa syudad sa Malaybalay ang gikaingong nagpadayon nga korapsyon sa gobyerno isip usa sa mga hinungdan sa mikunhod nga kinitaan ug halin sa ilang mga produkto, hilabina karong holiday season.
Sa eklusibong pakighinabi sa Bombo Radyo Malaybalay kang Jemma Del Rosario, usa ka fruit vendor, gibutyag niini nga mingaw ang palit sa mga prutas karon kung itandi sa mga miaging tuig.
Matud pa niini, ang kakulang sa salapi sa katawhan ug ang pagsaka sa presyo sa mga palaliton gilangkuban sa epekto sa korapsyon ang nakapaluya sa kahimtangan sa ekonomiya ug nakapakunhod sa kapasidad sa mga konsumidor sa paggasto.
Matud usab kang Vivian Buton, usa ka terminal vendor, mikunhod usab ang halin bisan pa man sa kadaghang byahedor nga nag-atang sa terminal.
Sumala niini, kasagaran sa mga pasahero tubig lamang ang paliton tungod sa gipahugtan nga badyet.
Samtang sa kahimtang sa mga pasahero, gibutyag ni Mariz Heart Tiozon, usa ka byahedor nga nanakayan gikan sa Malaybalay City padulong sa Tagum City, nga taliwala sa kadugay sa paghulat ug sa hiot nga kahimtangan sulod sa bus, mas pilion niini ang pag-commute kontra magrenta og pribadong sakyanan.
Matud pa niini, mas dako ang magasto sa pagrenta ug halos doble ang kamahal sa singil, nga dili na angay sa kasamtangang kahimtangan sa ekonomiya.