Nagpahimangno ang Police Regional Office 10 sa tanang personahe sa kapulisan batok sa pagpabuto og armas hilabi na sa panahon sa pasko ug bag-ong tuig.
Sa eksklusibong pakighinabi sa Bombo Radyo Malaybalay kang PMaj. Joann Navarro, tigpamaba sa PRO-10, nga higpit nga silotan ang bisan kinsang pulis nga masakpan nga magpabuto sa armas nga wala’y igong rason o mogamit niini gawas sa opisyal nga katungdanan.
Sumala pa ni Navarro, lakip sa posibleng silot ang administratibong kaso ug pagtangtang sa serbisyo, subay sa balaod ug mga patakaran sa Philippine National Police.
Gibutyag usab ni PMaj. Navarro, nga giwala na ang praktis sa “nozzle taping” sa mga armas sa kapulisan ug gisigurong mas gipakusgan ang disiplina, responsableng pagdala sa armas, ug ang estriktong pagmonitor sa paggamit niini.
Gitinguha usab sa PRO-10, nga makab-ot ang “zero stray bullet incident” sa rehiyon, kauban ang mas hugot nga kampanya batok sa loose firearms aron masiguro ang malinawon ug luwas nga pagsaulog sa pasko ug bag-ong tuig.