Mukabat sa kapin P17 milyon ang kantidad sa illegal nga droga nga nakumpiska sa Police Regional Office 10 sulod lamang sa usa ka semana nga sunod-sunod nga operasyon nga gipahigayon gikan Disyembre 12 hangtod Disyembre 18, 2025.
Sumala sa PRO-10, 132 ka mga indibidwal ang nadakpan sa nagkalain-laing kampanya batok sa kriminalidad sa tibuok Northern Mindanao.
Sa kampanya batok sa illegal nga droga, gipahigayon ang 62 ka operasyon nga miresulta sa pagkasikop sa 71 ka indibidwal ug pagkakumpiska sa 2,547.072 gramos nga shabu ug 20 gramos nga uga nga dahon sa marijuana, nga gibanabana og kantidad nga P17,322,489.60.
Dugang pa niini, adunay 11 ka operasyon ang gilunsad sa kampanya batok sa illegal nga sugal, nga miresulta sa pagkasikop sa 14 ka indibidwal ug pagkakumpiska sa mga illegal nga gamit sa sugal nga nagkantidad og P4,119.
Samtang sa operasyon batok sa mga wanted persons, 43 ka persona ang nadakpan, lakip na ang unom ka Most Wanted Persons ug 37 ka laing Wanted Persons.
Sa kampanya batok sa mga loose firearms ug kontra boga, adunay 13 ka operasyon nga miresulta sa pagkasikop sa upat ka indibidwal ug pagkakumpiska, boluntaryong pagsurender, ug pagrekober sa 16 ka gagmay’ng armas.
Sa laing bahin, upat ka operasyon batok sa illegal nga pagmina nga miresulta sa pagkakumpiska sa mga gamit nga gibanabanang nagkantidad og P36,380.
Aduna usab pitoka operasyon batok sa smuggling cigarettes ang gipahigayon nga miresulta sa pagkasakmit sa mga kontrabando nga sigarilyo nga nagkantidad og P1,233,600.Â