Gisugdan na sa Regional Civil Security Unit–10 ang hugot nga pang-inspeksyon sa mga tindahan sa pabuto sa probinsya sa Bukidnon ug sa mga kasikbit nga lugar, isip kabahin sa paningkamot nga masiguro ang luwas nga pagsaulog sa kapaskohan ug sa bag-ong tuig.
Matud ni PCol. Jeffrey Bilaro, Hepe sa Regional Civil Security Unit–10, nakumpiska sa dakbayan sa Valencia ang pipila ka imported ug mga ginadili nga pabuto, taliwala nga ang maong mga tindahan adunay balidong permit sa pagbaligya ug nakaseminar sa mga ginadili.
Giklaro usab niini, nga ang inspeksyon magpadayon hangtod matapos ang holiday season, lakip na ang bag-ong tuig, ug kauban niini ang pagpahimangno sa mga mamaligyaay sa hustong pagdisplay ug pagbaligya sa mga pabuto subay sa balaod.
Sa laing bahin, gipahimangnoan usab ang publiko nga mamalit lamang sa mga otorisado ug rehistradong retailers ug likayan ang online nga pamalit tungod sa peligro ug illegalidad niini.
Sigon pa ni PCol. Bilaro, ang bisan kinsang mapamatud-ang maglapas sa balaod sa mga ginadili nga pabuto mag-atubang og mga silot, lakip na ang multa, pagpreso, ug pagkansela sa permit nga gibase sa balaod.