Nasakmit sa kapulisan ang kapin sa ₱1.14 milyon nga kantidad sa smuggled nga sigarilyo sa nagkadaiyang lungsod sa lalawigan sa Bukidnon pinaagi sa managlahi nga operasyon kagahapong adlawa.Sa Kadingilan, Bukidnon, nadakpan ang gituohang smuggled nga sigarilyo atol sa checkpoint operation sa Brgy. Bagor alas 11:10 sa buntag.
Matud pa ni Pcpt. Larry T. Malhin, Officer in charge sa Kadingilan Municipal Police Station nga aduna na silay impormasyon nga nadawat nga posibling muagi sa lugar ang sakyanan hinungdan nga ila kining giatangan.
Apan pag abot sa checkpoint nadakpan ang driver sa usa ka SUV nga gimaneho sa usa ka 41 anyos nga lalaki.Apan sa inspeksyon nasuta ang daghang kahon sa sigarilyo nga walay mga graphic health warnings. Sumala sa report gikan sa Cotabato ang maong sakyanan og nakumpiska ang 28 ka kahon nga adunay 83 ka reams.
Samtang sa Quezon, Bukidnon pasado alas 10:25 sa buntag nakumpiska sa kapulisan ang 20 ka reams sa gituohang smuggled nga sigarilyo.
Nadakpan ang usa ka 55-anyos nga lalaki nga nasapnan nga nagdala sa sigarilyo nga walay graphic health warnings samtang nagmaneho sa iyang motorsiklo sa Brgy. Mibantang.
Ang mga nadakpan anaa na karon sa Kadingilan ug Quezon Municipal Police Station, samtang giandam na ang kaso batok kanila.