Dili moperma si Senator Panfilo “Ping” Lacson sa ratipikasyon sa 2026 budget bill kung ipadayon sa bicameral conference committee ang pagpondo sa mga kontrobersiyal nga aid programs nga iyang giila isip bag-ong porma sa “pork barrel.”
Lakip sa gitumbok niini ang ₱51 bilyon nga pondo alang sa Medical Assistance to Indigent and Financially Incapacitated Patients kon (MAIFIP) sa Department of Health kon (DOH).Gibutyag sa Senador nga ang maong pondo angay unta nga i-realign ngadto sa mga programa sa Universal Health Care sama sa pagsiguro sa zero billing alang sa mga pasyente.
Gipunting usab ni Sen. Lacson nga ang paggamit sa guarantee letters gikan sa mga politiko magpadayon lamang sa patronage politics imbis nga mohatag og tinud-anay ug hustong serbisyong panglawas alang sa mga Pilipino, ilabi na sa mga kabus.
Girekomenda sa Senador nga posible pa nga magbutang og mga safeguards pinaagi sa special provisions samtang nagpadayon ang mga deliberasyon sa bicam, ilabi na aron mapugngan ang dili hustong pagkontrol sa mga pinansyal nga tabang nga walay angay nga assessment.
Usa pa sa mga butang nga nakapahimo kang Sen. Lacson nga dili molagda sa ratipikasyon sa badyet mao ang farm to market roads project sa Department of Agriculture diin doble sa gihangyo sa Presidente ang giaprobahan nga alokasyon sa bicam nga mikabat sa ₱33 bilyon.