Gibatikos sa kampo ni kanhi presidente Rodrigo Duterte ang mga Prosecutor sa International Criminal Court (ICC) nga nagbuhat matud pa og “back-door appeal” aron buhion pagbalik ang hurisdiksiyon sa korte sa Pilipinas, bisan pa nga mibulag na ang nasud gikan sa Rome Statute sukad pa niadtong 2019.
Sa unom ka panid sa dokumento nga gisumite sa ICC Appeals Chamber, giingon sa lead counsel ni Duterte nga si Nicholas Kaufman nga gipasobraan sa prosekusyon ang interpretasyon sa balaod aron matabunan ang ilang kapakyasan sa paglusad og imbestigasyon samtang miyembro pa ang Pilipinas sa ICC.
Matud niini, ang kapakyasan sa Prosecutor nga ablihan ang imbestigasyon sa dili pa mibulag ang usa ka estado gikan sa korte dili angay ibalhin sa akusado ug dili usab angay ipugos pinaagi sa pagbaliktad sa legal nga interpretasyon nga makadaot sa katungod sa suspetsado sa husto nga proseso.
Dugang pa sa kampo ni Duterte nga ang ilang gisang-at nga dokumento mao ang pormal nga tubag sa bag-ong argumento sa prosekusyon nga nag-insistir nga magpabilin ang hurisdiksiyon sa ICC bisan pa og dili na miyembro ang Pilipinas sa Rome Statute.
Gipunting sa depensa nga nagsuporta sila sa nag-unang ruling sa Pre-Trial Chamber nga naglatid nga mawala ang hurisdiksiyon sa korte kung dili na miyembro ang usa ka nasud sa panahon nga gisugdan sa Prosecutor ang pormal nga imbestigasyon.