Gipaabot karon sa Malaybalay City Water District ang final termination sa kontrata sa Prime Water karong Disyembre 22 human mapakyas ang kompanya sa pagtubag sa reklamo.
Sa pakighinabi sa Bombo Radyo Malaybalay kay Engr. Nolito Binahon, General Manager sa MCWD, gipasabot niini nga obligadong magpagawas og counter-affidavit ang Prime Water sa dili pa ang katapusang petsa aron motubag ang mga isyu nga gisang-at batok kanila. Matod niya nga hangtod karon wala pa’y tubag ang kompanya bisan pa nga gipasaka na ang pre-termination notice.
Gidugang ni Binahon nga bisan naay mga “surgical intervention” nga gi-implementar sa pipila ka lugar, nagpabilin ang dagkong problema sa supply, rason nga gi-rate niya nga “needs improvement” ang performance sa Prime Water.
Sa laing bahin, gikumpirma ni Binahon nga napakyas ang paningkamot nga ipa-go into terms ang Prime Water ug Hanabana kay aron masulbad ang panubig sa syudad. Ang MCWD dili usab makakontrata og laing entity samtang binding pa ang kasabutan sa Prime Water.
Gipahibalo ni Binahon nga kung mapalagpot ang Prime Water pagkahuman sa Disyembre 22, andam na ang Malaybalay City Water District nga mosalo sa operasyon sumala sa gitugot sa balaod.