Gibutyag ni Presidente Ferdinand Marcos Jr. nga gikansela na sa Department of Foreign Affairs (DFA) ang pasaporte ni kanhing Ako Bicol Partylist Rep. Zaldy Co, usa sa mga giimbestigahan nga may kalabotan sa anomalya sa flood control project.
Matod sa Presidente, gisugo niini ang DFA ug PNP nga makig-koordinar sa tanang embahada sa Pilipinas aron masiguro nga dili na magamit ni Co ang kanseladong pasaporte aron makalikay sa kaso nga iyang giatubang.
Lakip sa koordinasyon ang paspas nga pag-report kung pananglit mosulay si Co og pagsulod sa lain nasud, aron dali usab siyang mairepatriate pabalik sa Pilipinas.
Gikumpirma usab sa Presidente nga nagpabilin sa kustodiya sa NBI si Sara Discaya, nga giimbestigahan usab sa parehas nga kaso, human kini nga misurender bisan pa man wala pay giisyu nga warrant of arrest batok kaniya.
Gisiguro ni Marcos nga hapsay ang dagan sa proseso ug atubangon ang hustisya sa tanang nahilambigit sa giingong operasyon ug pakigkunsabo nga nagpaluyo sa hugawng transaksyon sa mga flood control project.
Padayon gihapon ang imbestigasyon ug pagpasaka og kaso aron manubag ang mga responsable ug mabalik ang kuwarta sa katawhan nga gituohang nausik tungod sa maong anomalya.