Nasayran karon nga padayon ang pagsaka sa agricultural ug logistics losses kon alkansi sa Northern Mindanao tungod sa pagkahugno sa dalan sa Sitio Palacapao, Quezon, Bukidnon, nga usa sa nangunang ruta paingon sa Davao Region.
Sa pakighinabi sa Bombo Radyo Malaybalay kang Ray Talimio Jr., kanhi miyembro sa Oro Chamber ug Economic Development Committee sa RCD-X, gibutyag nga ang alkansi sa sektor sa agrikultura ug logistics mikabat na og P83 milyon matag adlaw.
Base usab sa gipanagtag sa Department of Agriculture pinaagi sa Philippine Statistics Authority kon PSA ug Department of Development kon DepDev, mikabat sa P187.53 milyon ang average economic losses sa matag adlaw.
Nunot niini, gihangyo ni Talimio Jr., ang Department of Public Works and Highways nga paspasan ang pagrehabilitate sa nahugnong bahin sa dalan aron malikayan ang dugang nga paggrabe sa economic losses ug aron ma-normalisar ang supply movement sa pang-agrikultura.