Wala nay dakong problema sa pag pang apod apod sa mga plate numbers sa syudad sa Malaybalay kini human sa 90% nga nahatag na nga mga backlogs alang sa mga nanagiya sa mga sakyanan. Aapan likod sa maong kalamboan nagpabilin gihapon ang dakong hagit gikan sa mga lagyong residente sa dakbayan nga wala pa nakadawat sa ilang mga orihinal nga plate numbers.
Sa eksklusibong pakighinabi sa Bombo Radyo kay Juntilee T. Goc-ong, Supervising Transportation Regularization Officer sa Land Transportation Office (LTO) – Malaybalay City nga ang mga nagapuyo sa mga so-ok nga barangay ang nahimong pinakadakong problema sa kasamtangan.
Saysay pa ni Goc-ong, samtang ang ilang opisina nagpadayon sa pag-release sa mga backlog, aduna gihapon mga indibidwal nga wala pa nakadool sa ilang buhatan, lakip na ang mga naggamit pa og temporary plate numbers, mga naggamit og green plates ug ang mga naggamit pa og plate numbers nga adunay pito ka karakter.
Matud pa niini, ang tanan nga naggamit sa mga temporary plates ug outdated nga plates kinahanglan na magdool sa pinakadool nga LTO office aron makuha ang ilang updated nga plate numbers nga nagsunod sa mando sa LTO nga nag-ingon nga kinahanglan makita ug klaro ang mga plate number sa tanan nga sakyanan.