Nagpadayon ang imbestigasyon sa Maramag Municipal Police Station kalabot sa insidente sa pagpangdunggab nga nahitabo sa Barangay South Poblacion, Maramag, Bukidnon, gahapong adlawa, Nobyembre 30, 2025, alas-11:30 sa gabii.
Daling girespondehan sa kapulisan ang tawag kabahin sa insidente, apan pag-abot sa lokasyon, nakaikyas na ang mga nalambigit sa insidente.
Nakaplagan sa yuta ang mga marka sa dugo, mga bato, ug buak nga botelya sa bino.
Sa inisyal nga imbestigasyon, atol sa selebrasyon sa fiesta sa maong lungsod, adunay duha ka grupo nga nagbangi tungod sa init nga panaglalis nga miresulta sa kagubot ug pagpangdunggab.
Giila ang mga nalambigit nga nagtagay sa usa ka tindahan, sila si alias Dagul, lalaki, hingkod ang panuigon, nakaamgo og samad sa dughan ug ngabil, ug usa ka kauban niining lalaki nga aduna usab samad dinunggaban, ug kasamtangang nagpaalim sa balay tambalanan.
Samtang ang laing grupo nga giilang sila si alias “Melvin”, 48 anyos, nga adunay samad sa ulo, uban ang usa ka lalaking kauban nga adunay usab lima ka samad dinunggaban sa likod.
Gikatahong aduna usab usa ka menor-de-edad nga babaye nga gikaingong gisumbag sa dughan sa grupo ni alias Melvin.
Samtang, adunay usa ka kauban sa grupo ni Melvin nga giila si alias Jerico, lalaki, nakaplagan 25 metros gikan sa eksaktong lugar sa krimen ug aduna usab dinunggaban.
Nakuha sa posisyon ni alias Jerico, ang duha ka kutsilyo nga lima ka pulgada ang gidak-on. Kasamtangang ngadayon ang imbestigasyon sa kapulisan aron matino ang tinuod nga hinungdan sa panagbangi lakip na ang responsable sa insidente.