Gisalikway sa Sandiganbayan Fifth Division ang hangyo sa pito (7) ka opisyal sa Department of Public Works and Highways (DPWH) nga i-suspend o i-basura ang ilang mga arrest warrants nga may kalabutan sa giingoong flood control scam sa Oriental Mindoro.
Sumala sa petisyon sa Lim & Yutatco-Sze, representante nila Gene Ryan Altea, Ruben Santos Jr., Dominic Serrano, Montrexis Tamayo, Juliet Calvo, Dennis Abagon, ug Lerma Cayco, nga giingon nga adunay “blatant violation” sa due process ang pagkafile sa kaso sa Office of the Ombudsman.
Apil usab sa una nga batch sa mga kaso ang kanhing Ako Bicol Rep. Elizaldy “Zaldy” Co ug ang board of directors sa Sunwest Inc., nga giingon nga gipanag-iyahan ni Co.
Kini may kalabutan sa Mag-asawang Tubig River Flood Control Project nga nagkantidad og P289.5 milyon.
Ang kaso may kalabutan sa Anti-Graft and Corrupt Practices Act (RA 3019) ug malversation of public funds through falsification of public documents, base sa findings sa Independent Commission for Infrastructure (ICI) nga nag-ingon nga substandard ang gigamit nga materyales sama sa steel sheet piles.
Gisiguro sa mga DPWH officials nga ongoing pa ang proyekto ug dili pa angay tapuson ang konklusyon.
Apan gibarugan sa Ombudsman nga substandard ug dili kompleto ang proyekto, ug giuyunan kini sa Sandiganbayan nga walay legal merit ang petisyon sa pito ka DPWH officials.
Tungod niini, ipatuman ang arrest warrants batok sa pito ka DPWH officials, sumala ni Ombudsman Jesus Crispin “Boying” Remulla, nga nagmando sa mga awtoridad nga ipatuman dayon kini.
Sumala sa listahan sa “Sumbong sa Pangulo”, lakip ang Sunwest sa top 15 contractors nga nakadawat og dili muminus P10 bilyon gikan Hulyo 7, 2022 hangtod Mayo 2025 para sa mga flood control projects ilawom sa administrasyong Marcos.