Mukabat sa P11,087,816 ang nakumpiska sa Police Regional Office 10 kon PRO10 gikan sa nagkadaiyang illegal nga kalihokan sa Rehiyon.
Lakip niini ang 181 ka indibidwal nga naaresto diin adunay 5 Most Wanted Persons usab ang nasikop atol sa usa ka semana nga operasyon gikan Nobyembre 14 hangtod 20, 2025.
Sa anti-illegal drugs campaign, adunay 78 ka operasyon ang gipahigayon nga miresulta sa pagdakop sa 96 ka indibidwal ug pagkumpiska sa 824.171 gramos nga shabu ug 5 gramos nga uga nga dahon sa marijuana nga adunay gibanabana nga Standard Drug Price nga P5,604,962.
Sa operasyon illegal gambling, 10 ka operasyon ang gipahigayon nga nagresulta sa pag-aresto sa 16 ka indibidwal ug pagkumpiska sa illegal gambling items nga nagkantidad ug P2,704.
Samtang sa kampanya batok wanted persons, 60 ka indibidwal ang nadakpan, diin 5 niini maoy Most Wanted Persons, samtang 55 ang ubang wanted sa lain-laing kaso sa rehiyon.
Ilawom sa kontra loose firearms, adunay 28 ka operasyon ang gipahigayon nga miresulta sa pagdakop sa 9 ka indibidwal, ug pagkumpiska, pag-surender, o pag-recover sa 28 ka mga armas ug 2 ka light weapons.
Samtang sa tulo ka operasyon batok illegal mining, nakumpiska ang ekipo ug materyales nga nagkantidad og P419,510. Samtang batok smuggling cigarette, nakumpiska ang kontrabando nga nagkantidad og P5,060,640.