Nabahin karon ang mga reaksyon sa katawhan human sa kontrobersyal nga pamahayag ni Senadora Imee Marcos kabahin sa gikaingong pagkalambigit sa illegal nga droga sa iyang igsuon nga si Presidente Ferdinand “Bongbong” Marcos Jr. ug sa First Lady Liza Marcos.
Sa pakighinabi sa Bombo Radyo Malaybalay kang Lakandupil S. Ramos, kanhing Barangay Kagawad sa Barangay Sumpong, Malaybalay City, gibutyag niini nga wala na kini makurat sa rebelasyon sa Senadora, sanglit kaniadto pa kini gibulgar sa publiko ni kanhing Presidente Rodrigo Duterte.
Sumala pa niini, kung ang usa ka lider nagdumala nga adunay illegal nga binuhatan, gilauman nga mulubog ang ekonomiya.
Dugang pa ni Ramos, wala niini nabati ang klaro ug lantad nga maayong buhat sa kasamtangang administrasyon gawas lamang sa pipila ka inisyatiba sa lokal nga kagamhanan ug lokal nga mga opisyales.
Gipanawagan pa niini nga muresign na ang Presidente aron mahupay ang kasamok sa nasudnong politika ug korapsyon.
Samtang sa laing bahin, si alyas “Susan,” usa ka street sweeper, miluwat sa pagsupak niini sa pamahayag ni Sen. Imee Marcos diin gikwestyon niini ang papel niini isip igsuon sa Presidente ug sa mga pasangil nga wala’y saktong ebidensya.
Dugang pa niini nga tali sa tanang Presidente nga miagi, si Pres. Bongbong Marcos lamang ang nakapabulgar sa daghang isyu sa gobyerno nga wala gihimo sa milabay nga mga lider.
Sigon ni alyas “Susan” si Presidente Marcos Jr. lamang ang makapalambo sa Pilipinas ug hugot niining gisuportahan ang posibilidad nga modagan pa kini pag-usab sa umaabot nga eleksyon.