Mitubag ang Malacañang sa pasangil nga naggamit og droga si Presidente Ferdinand Marcos Jr. human kini gibutyag sa iyang igsuon nga si Sen. Imee Marcos, diin giingon sa Palasyo nga walay basehan ug desperadong pag-atake ang maong pahayag.
Gipahimangnoan ni Palace Press Officer Claire Castro nga dugay nang napamatud-ang negatibo ang mga drug test sa Presidente, lakip na ang voluntary test kaniadtong 2021 ug ang test sa St. Luke’s Medical Center sa 2024.
Hinuon gidapit sa opisyal ang senadora nga mudapig sa administrasyon ug magkigtinabangay na lamang sa pagbatok sa korapsyon.
Ang maong pamahayag misunod atol sa gipahigayong rally nga gipanguluhan sa INC human gibulgar ni Senador Imee Marcos nga nagamit og droga ang iyang igsuon nga presidente sa nasud.