Nakapyansa na ang maestrong mipuspus sa iyang kaubanang maestra sa Balila Elementary School.
Sa pakighinabi sa Bombo Radyo Malaybalay kang PMaj. Anthony Townend, Hepe sa Lantapan Municipal Police Station, mibutyag nga wala na gidayon nga pasakaan og kaso nga physical injury sa biktima nga si Rasel D. Molina, Officer-in-Charge ug Teacher III, human masabtan ang kahimtang sa mental health sa maong maestro nga giilang si alyas “John.”
Matud ni PMaj. Townend, milabaw ang konsiderasyon sa mental health condition sa suspetsado, hinungdan nga gipalabi sa biktima ang desistance ug wala na mopadayon sa physical injury complaint.
Apan nagpabilin ang kaso sa malicious mischief tungod sa nalabing damage nga miabot og kapin P120,000 sa school property diin napyansahan gilayon usab sa pamilya sa suspetsado.
Samtang anaa sa kustodiya sa Barangay ang maong maestro sa isolation room hangtod maayo na ang mental state condition niini ingun usab nga adunay magmonitor gikan sa barangay workers.
Gibutyag usab sa Hepe, nga magpadala og counseling ang Lantapan MPS aron matabangan ang kahimtang sa maestro ingun man sa kaubanan niining magtutudlo nga natrauma sa panghitabo.
Samtang nakabalik na sa normal ang klase sa mga estudyante, apan nagpabilin nga ubos sa supervision sa LGU, DepEd-Bukidnon, ug kapulisan aron masiguro ang kahimsog sa panghunahuna ug kaluwasan.
Kahinumdoman nga ang insidente nahitabo niadtong Nobyembre 12, 2025, sa Balila Elementary School gumikan mitukar ang mental health condition sa maong maestro diin natrigger usab sa wala gibasa ang log-in niini sa biometric attendance system, hinungdan sa kasuko gipuspusan og stand fan sa ulo ang kauban niini magtutudlo.