Gipadayag sa kanhi kongresista nga si Zaldy Co nga daghan pa siyang ihatag nga impormasyon nga makapatin-aw kabahin sa korapsyon sa flood control projects, base sa ikatulong video nga iyang gipagawas kagahapong adlwang Domingo, Nobyembre 16.
Lakip niini ang mga gisulti ug giangkon ni kanhi DPWH Bulacan 1st District engineer Henry Alcantara ug uban pa nga gitawag niyang “DPWH boys” sa Independent Commission for Infrastructure (ICI).
Gipasabot ni Co nga dili lang P21 billion, kondili P56 billion ang kantidad sa kickbacks nga nadawat matud pa ni Presidente Ferdinand Marcos Jr. ug kanhi House Speaker Martin Romualdez.
Kahinumduman, sa Senate hearing niadtong Setyembre, giangkon ni Hernandez nga naghatod kini og mikabat sa P1 billion nga kantidad sa kwarta nga gibutang sa maleta ngadto sa staff ni Co.
Samtang, gisiguro sa kanhi kongresista nga iyang ipagawas ang tibuok detalye sa sunod nga mga adlaw ug naglaum nga dili siya mapatay sa wala pa niya mapadayag ang tanan niyang nahibal-an.