Patay ang 12 ka tawo ug samaran ang 27 pa sa usa ka suicide attack nga nahitabo gawas sa korte sa Islamabad, Pakistan.
Sumala sa Pakistan Interior Minister Mohsin Naqvi, gisulayan sa bomber nga atakihon ang courthouse apan wala kini nakasulod sa building.
Wala pa masayri kung unsang grupo ang nagbuhat sa maong pag-atake, apan nagpahigayon na ug striktong imbestigasyon ang mga otoridad aron mailhan ang suspetsado.
Ang tanan nga samaran gidala na sa mga balay tambalanan samtang gikondina ni Pakistani President Asif Ali Zardari ang maong insidente ug nangayo ug pasalig sa seguridad sa publiko.
Nagpabilin ang kahadlok ug kabalaka sa Islamabad samtang padayon ang imbestigasyon sa pag-atake ug gipasabot sa gobyerno nga buhaton ang tanan aron maprotektahan ang katawhan ug malikayan ang susamang insidente sa umaabot.