Kusganong gisuportahan sa Association of Labor Organizations kon ALO, lakip usab sa Trade Union Congress of the Philippines kon TUCP ug uban pang sektor sa labor ang umaabot nga anti-corruption rally.
Matud pa ni Nick Borja, usa ka labor consultant, ang suporta gikan sa mga employer ug mga representante sa labor sector nagpakita sa kabalaka sa negatibong epekto nga dala sa korapsyon sa ekonomiya sa nasud.
Gibutyag ni Borja nga tungod sa padayon nga isyu sa korapsyon, daghang investors ang nagduhaduha sa pag-invest sa Pilipinas, hinungdan nga naapektohan ang kalambuan sa ekonomiya ug ang kahimtang sa mga trabahante.
Miluwat usab kini, nga labing apektado ang nasud hilabi na ang kakulang sa klarong plano sa mga proyekto sama sa flood control, nga nagresulta sa kadaot sa mga kabtangan ug imprastruktura sa panahon nga adunay kalamidad.
Gipasiugda usab sa ALO ug sa uban pang labor groups nga ang rally usa ka paagi aron ipakita ang tingog sa publiko batok sa korapsyon, ug aron mapadali ang mga reporma nga makahatag benepisyo sa ekonomiya ug sa katawhan.