Giisa na sa signal number sa daghang lugar sa Pilipinas human misulod sa Philippine Area of Responsibility (PAR) ang bagyong Uwan.
Sumala sa Philippine Atmospheric, Geophysical and Astronomical Services Administration (PAGASA), ang sentro sa bagyo nakita sa sidlakang bahin sa Eastern Visayas.
Nagdala kini og kusog nga hangin nga 120 kilometers per hour ug pagbugso nga hangtod 150 kph, samtang nagalihok paingon sa West northwestward nga adunay 20 kph nga gikusgon.
Ang mga lugar nga gibutang sa Signal No. 1 naglakip sa daghang bahin sa Isabela, Quirino, Nueva Vizcaya, Aurora, Rizal, Laguna, Quezon, Romblon, Marinduque, Camarines Norte, Camarines Sur, Albay, Catanduanes, Sorsogon, Masbate (lakip ang Ticao ug Burias Islands), ug daghang lugar sa Eastern ug Western Visayas sama sa Northern Samar, Eastern Samar, Samar, Biliran, Leyte, Southern Leyte, Cebu (lakip ang Bantayan ug Camotes Islands), Bohol, Negros Occidental, Iloilo, Capiz, ug Aklan.
Gipaabot nga makasinati ang mga lugar niini og kusog nga ulan, hangin, ug posibilidad sa storm surge.
Sumala sa PAGASA, posibleng mo-landfall ang bagyong Uwan sa southern Isabela o northern Aurora sa gabii sa Domingo (Nobyembre 9) o kadlawon sa Lunes (Nobyembre 10).
Gibana-banaan usab nga mahimong super typhoon ang bagyo karong Sabado sa gabii o Domingo sa buntag.
Padayon nga nagpahimangno ang PAGASA sa mga lugar nga posibleng maagian sa bagyo tungod sa kusog nga hangin ug ulan nga makahatod og peligro sa kinabuhi ug kabtangan.