Mitala ang National Disaster Risk Reduction and Management Council (NDRRMC) og kapin 140 ka patay ug 127 ka mga nangawala tungod sa kalamidad nga gidala sa Bagyong Tino sa Visayas ug Mindanao. Sa ulahing datos sa NDRRMC, 114 pa lamang ang unang gikataho nga patay apan nadungagan kini og 28 gikan sa Cebu, ang labing grabeng naapektuhan nga probinsya, nga nakatala og 71 patay.
Ang Cebu, diin ikaduhang nibangga ang bagyo, nakasinati og grabe nga pagbaha nga mibira og mga sakyanan ug nakapalubog sa tubig ang daghang kabalayan.Nakatala usab og mga patay ang Negros Occidental, Negros Oriental, Agusan del Sur, Southern Leyte, Antique, Bohol, Capiz, Iloilo, ug Leyte. Apil sa mga nabiktima ang unom ka miyembro sa military helicopter crew nga nahagsa samtang nagdala og tabang sa mga apektadong lugar.
Samtang, si DPWH Secretary Vince Dizon misaway sa kapakyasan sa mga flood control projects sa Cebu atol sa kalamidad, nga matod pa niini, “wala naglihok sumala sa gituyo.” Gibutyag ni Dizon nga ang mga proyekto kulang sa husto nga plano ug implementasyon.
Matod pa niini, kinahanglan ang kompletong repaso sa mga proyekto sa pagbaha dili lang sa Talisay City apan sa tibuok probinsya sa Cebu. Gipasabot usab niini nga ang tinuod nga solusyon mao ang pagkontrol sa tubig gikan sa kabukiran padulong sa ubos, tungod kay walay igong flood control structures sa upstream area sa Mananga River.