Gipanghimakak sa kapulisan ang mga pasangil nga napasagdan nila ang padayon nga pagkalat sa smuggled nga sigarilyo sa Rehiyon 10, ilabi na nga nagpadayon ang ilang operasyon batok sa iligal nga kalihokan sa rehiyon. Sumala ni Police Colonel Oliver S. Navales, Provincial Director sa Bukidnon Police Provincial Office (BukPPO), dili pasabot nga kung adunay nakalingkawas sa operasyon, wala nay aksyon ang kapulisan. Gipasabot niini nga sa sulod lang sa usa ka semana, nakahimo ang mga otoridad sa 12 ka operasyon ug nakumpiska kani sa kapin 515,000 ka smuggled nga sigarilyo.
Dugang pa ni Navales, aduna gihapoy mga nadakpan atol sa operasyon, apan dili kini 100 porsyento nga makompleto ang pagdakop sa tanan tungod kay ang uban nakalingkawas sa karsada sa panahon sa operasyon. Gipaninguha karon sa kapulisan nga mahibal-an ang tinubdan sa maong mga smuggled nga sigarilyo aron mapugngan ang pagpadayon sa iligal nga kalihokan.
Gipadayag sa BukPPO nga padayon ang ilang koordinasyon sa mga ahensiya ug lokal nga awtoridad aron mapatuman ang mas hugot nga pagbantay batok sa pagpanglimbong sa smuggled nga mga produkto sa rehiyon.