Naka blue alert status na ang dakabayan sa Malaybalay samtang padayon nga gibantayan ang epekto sa Bagyong Tino nga nagdala og kusog nga hangin ug pag-ulan sa probinsya.
Sa eksklusibong pakighinabi sa Bombo Radyo Malaybalay kay Arian Johnson Caga-anan, Operations and Warning Division Head sa City Disaster Risk Reduction and Management Office (CDRRMO) sa Malaybalay City nga kasamtangan anaa sa light to moderate rains ang siyudad ug ang ubang bahin sa Bukidnon.
Matod pa ni Caga-anan nga bisan wala pay kakulian nga natala sa 24/7 monitoring sa tibuok syudad kinahanglan gihapon nga magpabiling alerto ang publiko kay posible nga mausab ang kondisyon sa panahon.
Gipahimangnoan usab niini ang katawhan, labi na ang mga nagpuyo sa flood prone areas nga magmatngon ug kanunay mag-monitor sa update sa panahon aron malikayan ang disgrasya.
Kung adunay emerhensya o kakulian nga mahitabo, dugang ni Caga-anan nga makontak ang CDRRMO sa numero 0917-827-6117.