Nanguna na sa medal tally ang delegasyon sa Lungsod sa Manila sa nagpadayong Batang Pinoy National Championships niadtong Huwebes, Oktubre 30, 2025.
Kini human makadugang ang delegasyon sa tulo ka bulawang medalya sa swimming nga gipahigayon sa Antonio Acharon Sports Complex Pool sa Calumpang, General Santos City.
Ang mga medalya nakab-ot pinaagi ni Shiblon Montera alang sa boys’ 16–17 200m freestyle event, samtang sa girls’ 12–13 4x50m medley relay, nakadaog usab sila Jordane Porche Sales, Aoki McKenzie Teng, Elyzah Shayne Son, ug Aeesha Sharine Pesy.
Nakadugang pa sa listahan sa mga nagpasidungog sa lungsod sila Kristine Jane Uy, Naomi Sy, Patricia Mae Santor, ug Eliana Isabel Rodriguez alang sa 4x50m medley relay event.
Base sa partial ug unofficial results sa medal tally sa alas-6:00 sa gabii, Oktubre 30, 2025, nagpabiling lig-on sa unang pwesto ang Lungsod sa Manila nga adunay 32 ka bulawang medalya, 28 ka silver, ug 25 ka bronze nga adunay kinatibuk-ang 85 ka medalya.
Gisundan kini sa Lungsod sa Pasig nga adunay 30 ka bulawang medalya, 19 silver, ug 24 ka bronze diin sa kinatibuk-an muihap sa 73 ka medalya.
Sa ikatulong pwesto, anaa ang City of Baguio nga adunay 29 ka bulawang medalya, 17 ka silver, ug 22 ka bronze o kinatibuk-ang 68 ka medalya.
Sa ika-upat nga pwesto, ang City of Quezon nga adunay 21 ka bulawang medalya, 21 ka silver, ug 24 ka bronze kon kinatibuk-ang anaa sa 66 ka medalya, samtang ika-lima ang Lungsod sa Zamboanga nga adunay 18 ka bulawang medalya, 12 ka silver, ug 6 ka bronze nga adunay kinatibuk-ang nga 36 ka medalya.
Ang Batang Pinoy National Championships aduna usab mga pahalipay alang sa mga nagdaog nga mga lungsod diin ang overall champion makadawat og P5 milyon, P4 milyon alang sa second placer, P3 milyon alang sa third placer, P2 milyon alang sa fourth placer, ug P1 milyon alang sa fifth placer, nga adunay kinatibuk-ang P15 milyon nga prize pool.