Patay ang usa ka lalaki human gipusil sa iyang higala pasado alas 11:00 sa buntag kagahapong adlawa, Oktubre 30, 2021, sa P2A, Kahaponan, syudad sa Valencia.
Giila ang biktima nga si Michael Jake Perla, 29-anyos, adunay live-in partner ug residente sa P1, Brgy. San Martin, Malaybalay City.
Matud pa ni Marte Abales, Brgy Kagawad nga ang biktima padulong sa balay sa iyang paryente aron kuhaon ang bahin niini sa ani sa humay. Pag-abot sa lugar miabot matud pa si Ronnie Saldua ug nakiglalis kini sa biktima.
Parte usab sa ilang away mao ang kahimtang sa ilang quarry diin nag-init ang ilang komprontasyon hangtod nga misampot kini sa sumbagay.
Sa kalit nga higayon, gikuha ni Ronnie ang armas gikan sa iyang bulsa ug nagpabuto kaduha kahigayon ug giigo sa ulo sa biktima hinungdan sa hinanali niini nga kamatayon. Human sa insidente, dali nga midagan palayo ang suspek ug padayon pa karon ang hot pursuit operation sa kapulisan.
Gikumpirma usab ni Pcpt Jangad nga nagkokoordinar na ang mga otoridad sa ubang police stations aron madakpan ang responsable sa krimen.