Nakadiskubre ang Armed Forces of the Philippines (AFP) og 60 ka “ghost” o wala gyud napatindog nga flood control projects sa nagkadaiyang lugar sa nasud. Kini kabahin sa ilang pagtabang sa Department of Public Works and Highways (DPWH) sa pagsusi ug pag-verify sa mga proyekto nga nakarehistro sa public records.
Matod ni AFP Chief of Staff General Romeo Brawner Jr., gihatagan sila og coordinates kung asa gitukod ang maong mga proyekto, apan sa dihang gisusi kini sa mga sundalo, wala gyud nakitang aktuwal nga estruktura. Gisiguro ni Brawner nga 60 ka proyekto na ang napamatud-ang walay kamatuoran, bisan pa adunay kompleto nga rekord sa pondo, kontraktor, ug gigikanan sa pondo.
Kasamtangan, 8,000 ka flood control projects na ang nasusi sa AFP, apan posible pang motaas ang ihap samtang nagpadayon ang inspeksyon sa ubang mga lugar. Sa kinatibuk-an, 16,000 ka proyekto ang gikatakdang susihon sa AFP. Gipasabot usab ni Brawner nga limitado lamang ang papel sa militar — mao ra ang pagtino kung tinuod bang napatindog ang proyekto base sa koordinasyon.
Wala kini teknikal nga kahibalo sa pagsusi sa kalidad sa konstruksyon o sa pagsunod niini sa mga rekisitos. Ang tanang impormasyon sa AFP gipasaka na sa DPWH, nga mao nay magpadala sa ilang mga engineer aron i-validate ang mga resulta nga nakuha sa kasundalohan.