Hingpit nang gipakaway-sala sa kasong graft nga may kalabotan sa pork barrel scam sa Sandiganbayan si Former senator Juan Ponce Enrile, kanhi Senate President ug kasamtangang Chief Presidential Legal Counsel.
Base sa resolusyon sa korte, giabswelto si Enrile ug ang kanhing chief of staff nga si Gigi Reyes tungod sa kakulang sa ebidensya aron mapamatud-an ang kasabutan ug paglustay sa pondo.
Kahinumduman nga niadtong 2015, gitugotan kini sa Korte Suprema nga makapiyansa alang sa humanitarian grounds, usa ka desisyong gisulat ni kanhi Chief Justice Lucas Bersamin.
Pinaagi sa pag-abswelto ni Enrile, kompleto na ang trio sa mga kanhi senador nga nalaamabigit sa pork barrel scam nga gipakaway-sala usab sila Bong Revilla, Jinggoy Estrada, ug Enrile mismo.
Sa tibuok proseso, si Enrile lamang ang wala natanggong sa prisohan, gumikan nagpabilin kini sa hospital arrest hangtod nakadawat og kagawasan. Karon nga gipagawas ang desisyon, anaa siya sa ospital ug nag-monitor matud pa sa mga video conference.
Samtang sa pikas bahin, gideklarar usab sa Sandiganbayan nga guilty si Janet Lim-Napoles, ang giilang “pork barrel scam queen,” gumikan sa sayop nga paggamit sa Priority Development Assistance Fund kon (PDAF).
Gisang-at batok niiniang kasong graft, duha ka ihap sa malversation of public funds, ug duha ka ihap sa falsification of public documents.
Lakip sa mga nakasabay niyang gikasuhan mao ang pangulo sa National Livelihood Development Corporation ug si Michael Benjamin, kanhing political affairs chief ni kanhi Senador Gringo Honasan, nga nalambigit sa pagbalhin sa pondo sa mga peke nga NGO diin gipangulohan ni Napoles baylo sa gikaingong kickbacks.