Nagpabiling sirado ang Louvre Museum sa Paris sa publiko human sa natigayong pagpangawat.
Nakuha sa mga kawatan ang walo ka talagsaon ug mahalon matang nga mga alahas.
Base sa imbestigasyon, misabay ang mga kawatan sa pag-abli sa museum mga alas 9:30 sa buntag.
Ang upat ka mga suspek migamit ug sakyanan nga adunay mechanical lift aron makasulod sa Galerie d’Apollon pinaagi sa mga balkonahe duol sa Suba sa Seine.
Gikaingong nakasulod ang duha sa mga suspek pinaagi sa pagguba sa bintana gamit ang mga power tools.
Gihulga matud pa niini ang mga guwardiya una giguba ang duha ka display nga adunay sulod nga mga alahas.
Nahitabo ang pagpanulis sulod lamang sa upat ka minuto ug ang mga suspek misibat sakay sa duha ka scooter.
Lakip sa mga butang nga gikawat mao ang usa ka emerald necklace ug usa ka parisan sa mga ariyos gikan kang Empress Marie Louise; usa ka brooch nga nailhan nga “reliquary brooch”; Tiara ug brooch nga iya ni Empress Eugene, asawa ni Napoleon III, ug usa ka tiara niini, kwintas ug single nga ariyos gikan sa sapphire set nga iya ni Queen Marie-Amelie ug Queen Hortense.
Samtang nagpadayon ang imbestigasyon sa mga otoridad sa maong insidente.