Napuno sa kasubo ug kabalaka ang kahimtang sa pamilya sa duha ka biktima sa landslide sa Quezon, Bukidnon, human makumpirma nga ang ilang ginikanan maoy nadani ug natabunan sa pagkahunlak sa kalsada samtang nagpauli gikan sa merkado. Sa eksklusibong pakighinabi sa Bombo Radyo Malaybalay, gisaysay ni Elson Ubatay, anak sa magtiayon nga biktima, nga nagpahulay pa kini ang iyang ginikanan human maghatod og utanon gikan sa merkado sa Quezon sa dihang nahitabo ang insidente niadtong gabii, Oktubre 18, 2025.
Nasayran ni Elson nga mao gyud ang iyang ginikanan ang nadani human mailhan sa plate number sa ilang bao-bao ug sa video nga nagkalat online. Gibutyag pa niini nga gipulkaw pa kini sa iyang silingan tungod sa kabalaka nga wala pa makauli ang iyang ginikanan.
Sa laing bahin, gibati usab sa kalisod ang mga biyahero lakip ang mga drayber nga dili makalusot sa lanslide area. Si Eddie T. Vasaya, usa ka bus driver, mipadayag nga ilang gipasakay ang mga pasahero sa pikas bahin pinaagi sa pagbaklay sa luwas nga agianan aron makapadayon sa biyahe.Dugang pa, si Pajie Baser, usa ka fruit vendor, mipahayag nga naapektuhan ang iyang panginabuhian tungod sa pagkasirado sa dalan nga konektado sa ubang kasikbit nga lugar.
Padayon karon ang search and rescue operations sa Quezon, Bukidnon, aron makaplagan ang magtiayon nga gituohang nadani sa dakong landslide, samtang gipangita pa gihapon sa mga otoridad ang paagi aron mabalik ang normal nga pagbiyahe sa maong ruta.