Gipang-apod-aporan ni Presidente Ferdinand Marcos Jr og kapin ₱158.3 milyon nga pinansyal nga tabang ang mga lokal nga panggamhanan sa Davao nga grabeng naapektuhan sa magnitude 7.4 nga linog.
Sumala ni Palace Press Officer Usec. Claire Castro, ₱50 milyon niini alang sa Davao Oriental, ₱10 milyon sa Mati City ug tig-₱15 milyon sa mga lungsod sa Manay, Banaybayan ug Lupon. Samtang tig-₱10 milyon usab ang gihatag sa Tarragona ug Baganga.
Matod ni Castro, ang maong suporta gikan sa Office of the President gitumong aron matabangan ang mga Davaoeño nga makabangon gikan sa kadaut nga dala sa linog. Wala usab mahadlok si Presidente Ferdinand Marcos Jr. nga motungtong sa Davao bisan pa man kini ang balwarte sa pamilya Duterte.
Sa usa ka briefing, gibutyag ni Castro nga si Marcos Jr maoy lider sa tibuok nasud ug andam nga motabang sa tanan nga nanginahanglan.Gipasabot usab sa Pangulo nga padayon ang paghatag sa gobyerno og tabang hangtod ang tanang pamilya nga naapektuhan makabangon ug makasugod pag-usab.