Gideklara na ni US President Donald Trump nga natapos na ang giyera tali sa Israel ug Hamas human sa duha ka tuig nga panagbangi.
Gipahibalo kini sa US President sa wala pa siya mosakay sa Air Force One ug milupad paingon sa Israel, alang sa nakatakda nga pagpagawas sa tanan nga bihag sa Hamas gikan sa Gaza pipila ka oras gikan karon, isip kabahin sa kasabutan sa “ceasefire.”
Isip baylo, buhian usab sa Israel ang 250 ka preso nga Palestino ug kapin 700 ka detainees.
Samtang pag-abot ni Trump sa Israel, gilauman nga magkita sila ni Israeli Prime Minister Benjamin Netanyahu ug sa mga pamilya sa mga bihag sa Hamas, sa wala pa kini makig-atubang sa Israeli parliament sa Jerusalem.
Human niini, motabok siya sa Egypt aron mag-host, uban ni President Abdel Fattah al-Sisi, sa usa ka “summit on peace in the Middle East” nga sudlan sa kapin 20 ka mga lider sa kalibutan, lakip na si British Prime Minister Keir Starmer, aron suportahan ang plano ni Trump sa pagtapos sa giyera sa Gaza ug pagpasiugda sa kalinaw sa Middle East.
Samtang, sumala ni Shosh Bedrosian, tigpamaba sa buhatan ni Israeli Prime Minister Benjamin Netanyahu, ang Hamas magpagawas sa tanan nga buhi pa nga bihag ug ipasa kini sa Red Cross, nga motabang sa paghatod sa mga Israelis nga buhian ngadto sa border sa Israel.