Patay ang usa ka menor de edad nga batang babaye human mibangga ang iyang gimanehuan nga motorsiklo sa usa ka narra nga kahoy sa Barangay Mariquet, Solsona, Ilocos Norte.
Sumala ni Police Major Chris Anthony Sorsano, hepe sa Solsona Municipal Police Station, ang biktima residente usab sa Barangay Manalpac, Solsona ug giilang si alyas Nene.
Sa inisyal nga imbestigasyon, nadiskobrehan nga ang batang babaye gikan nakiginom sa iyang barkada sa wala pa hitabo ang insidente.
Saysay pa sa kauban sa biktima, nagkalalis kini sa iyang uyab, ayha pa man ang insidente, hinungdan sa dili mahibal-an nga rason.
Gumikan sa maong panaglalis, gituyo matud pa sa biktima nga ibangga ang motor sa kahoy, rason sa hinanaling kamatayon niini.
Nakabaton siya og daghang samad sa lawas, lakip ang samad sa iyang ulo.
Gisulayan pa kini og dala sa balay tambalanan, apan gideklarang patay na kini pag-abot sa ospital.
Gikumpirma usab ni Major Sorsano nga ang biktima wala nagsul-ob og helmet sa panahon sa insidente.