Aron mahasa ug mapalig-on ang kahanas sa mga bombero sa pag-atubang sa mga umaabot nga katalagman gibansay ang 102 ka bag-ong bombero sa usa ka espesyal nga training nga gipahigayon mismo sa dakbayan sa Malaybalay.
Sa eksklusibong pakighinabi sa Bombo Radyo Malaybalay kay SINSP Gabriel Solano gikan sa BFP National Headquarters nga ang maong aktibidad kabahin sa curriculum sa mga bombero.Usa sa mga tahas sa mga trainee mao ang paginspeksyon sa mga establisyemento aron masiguro nga luwas ug hapsay sa fire safety standards ang mga building sa syudad.
Gipasabot ni Solano nga importante ang maong pagbansay aron madugangan ang kahibalo ug kahanas sa mga bombero aron sila mahimong kompetente ug andam sa pagresponde sa emerhensiya.Ang training magpadayon sulod sa duha ka bulan nga maglakip sa diversified activities sama sa inspeksyon, rescue simulation, ug fire suppression exercises.
Gilangkuban kini sa mga bag-ong bombero nga naggikan pa sa Rehiyon 9, Rehiyon 10 ug BARMM.Gilauman sa Bureau of Fire Protection nga pinaagi sa maong pagbansay mas mapaayo pa ang kalidad sa serbisyo sa mga bombero ug mas maprotektahan ang katawhan sa hulga sa sunog ug uban pang katalagman.