Giklaro sa Bukidnon Provincial Medical Center (BPMC) nga walay natala nga naangol human sa nahitabong kusog nga linog kagahapong adlawa sa dakbayan sa Malaybalay.
Sa eksklusibong pakighinabi sa Bombo Radyo Malaybalay kang Dr. Miguel Antonio Prantilla, Chief of Hospital sa BPMC nga wala silay nadawat nga pasyente nga nasamdan apan adunay pipila nga nalipong tungod sa kakusgon sa pagtay-og sa yuta.
Matod pa ni Dr. Prantilla, normal ra kini nga reaksyon sa mga tawo human sa kalit nga paglinog apan iyang pahimangno nga magpabiling kalmado ug dili mataranta panahon sa kalisdanan aron malikayan ang problema.
Sa laing bahin, giangkon ni Dr. Prantilla nga andam ang ospital sa bisan unsang emerhensya, ilabi na panahon sa linog tungod kay matag medical personnel adunay tagsa-tagsa ka tahas sama sa pag-evacuate sa mga pasyente padulong sa mas luwas nga lugar kon magkinahanglan.