Gikumpirma ni Davao Oriental Governor Nelson Dayanghirang nga usa ka indibidwal ang namatay tungod sa kusog nga linog nga miigo sa maong probinsya karong Oktubre 10.
Sumala sa gobernador, ang biktima naggikan sa Mati City ug nahugnuan usa ka parte sa balay nga naguba atol sa pagtay-og.
Gisaysay usab sa gobernador nga daghang mga istruktura sa probinsya ang nadamyos, lakip na ang pipila ka mga balay, kalsada, ug mga pasilidad sa gobyerno.
Padayon karon ang assessment sa mga awtoridad aron masuta ang kadako sa kadaot ug ang kahimtang sa mga residente sa apektadong mga lugar.
Sa dihang nahitabo ang linog, dayon nga nagpagula og advisory si Gov. Dayanghirang alang sa kanselasyon sa mga klase sa tanang lebel ug suspensyon sa trabaho sa mga opisina, samtang gipahimangnoan usab ang mga lumulupyo nga dili sa una mosulod sa mga bilding o pasilidad aron malikayan ang disgrasya.
Sa mga larawan nga gipaambit sa social media account sa gobernador, makita ang mga nahulog nga yuta o (landslide), natumbang mga kahoy, ug naputol nga mga kable ug poste sa kuryente sa pipila ka kalsada, ilabi na sa lungsod sa Manay, nga mao ang episentro sa linog.
Padayon usab ang koordinasyon sa Provincial Disaster Risk Reduction and Management Office (PDRRMO) ug sa mga ahensiya sa seguridad ug kuryente aron maibalik ang normal nga kahimtang ug masiguro ang kaluwasan sa katawhan sa Davao Oriental.