Adunay klarong proseso ug mga rekisitos alang sa mga elected ug appointed Sangguniang Kabataan (SK) officials aron sila makabenepisyo sa gi offer nga Civil Service Eligibility. Kini base sa pinakabag-ong guidelines nga gipagawas sa Civil Service Commission (CSC).
Sa eksklusibong pakighinabi sa Bombo Radyo Malaybalay kay Atty. Danilo Dividina, City Election Officer sa Commission on Elections sa Malaybalay, nga ang maong pribilehiyo gihatag ngadto sa mga SK Chairman ug SK Kagawad nga nakahuman sa ilang tibuok termino nga tulo ka tuig ug adunay maayong record o good standing sa serbisyo.
Saysay ni Atty. Dividina, dili automatic ang paghatag sa Civil Service Eligibility. Kinahanglan kini agian og pormal nga proseso. Lakip sa mga requirements mao ang Proof nga nakadaog sa eleksyon, Certification of Proclamation nga ipagawas sa COMELEC ug Certification gikan sa Department of the Interior and Local Government (DILG) nga nagpamatuod nga ang maong opisyal nakatapos sa tibuok termino ug walay record sa irregularidad atol sa serbisyo.
Gipasabot pa ni Atty. Dividina nga ang tumong sa maong lakang sa CSC mao ang paghatag og oportunidad sa mga kabatan onan nga mas mapalambo ang ilang career sa serbisyo publiko ug aron sab sila mapasidunggan sa ilang aktibong partisipasyon sa lokal nga panggamhanan.
Kini nga eligibility mahimong gamiton isip kwalipikasyon sa pag-apply sa mga posisyon sa gobyerno nga nanginahanglan og Career Service Eligibility.