Nagpabiling hulga sa kasamok ug kalinaw sa nasud tungod sa rally kontra korapsyon, hinungdan nga gipatuman sa kapulisan ang hugot nga pagbantay batok sa posible nga kudita.
Sa pakighinabi sa Bombo Radyo Malaybalay, giklaro ni Police Major Joann Navarro, tagapamaba sa Police Regional Office 10 nga dili lamang katawhan apan apil na usab ang kapulisan nasuko sa isyu sa korapsyon, ilabi na kay sila mismo ang pinakadako nga taxpayers sa nasud. Gipanghimatuod usab nga nagapabilin silang matinud-anon sa konstitusyon ug sa ilang tahas sa pagpanalipod sa katawhan.
Gipasabot nga ang maong panawagan batok sa korapsyon nasentro atol sa State of the Nation Address ni Presidente Marcos, diin iyang gilantaw ang anomalya sa Department of Public Works and Highways, lakip na ang isyu sa mga flood control projects.
Mipasalig ang kapulisan sa rehiyon nga magpabilin silang nagkahiusa ug matinud-anon alang sa katawhan ug sa konstitusyon, bisan pa sa hulga sa kasamok ug kalisang sa nasud.