Sa nagpadayon nga imbestigasyon sa Senate Blue Ribbon Committee, may mga bag-ong personalidad nga nanggawas nga gilangkuban sa mga alegasyon sa overpricing, ghost projects ug mga maanomalyang kalihukan sa mga flood control projects.
Sa eksklusibong pakighinabi sa Bombo Radyo Malaybalay kay Atty. Proculo Sarmen nagpahayag nga ang maong mga isyu angay hatagan og hustong pagtagad tungod kay kwarta sa katawhan ang nakataya niini.
Matod pa ni Atty. Sarmen ang pagkabutyag sa mga anomalya nagpakita lamang nga adunay mga tawo nga dapat manubag ug atubangon sa pipila ang mga nalambigit sa korapsyon.
Dugang pa ni Sarmen, ang katawhan dili angay magpakahilom sa ingon ani nga mga isyu ug ang maong imbestigasyon usa ka positibong lakang aron makamugna og mas lig-on nga polisiya batok sa korapsyon.
Gilauman usab niini nga pinaagi sa mga pagdungog sa Senado, makab-ot ang hustisya ug matumbok ang tinud-anay nga responsable sa pagkawala sa pondo sa gobyerno. Sa kataposan, nanghinaut si Atty. Sarmen nga mas daghan pang mga testigos ang motunga sa sunod nga mga hearing aron mas mapalapad pa ang imbestigasyon ug matino gyud ang responsable sa maanomalyang kalihukan.