Gibutyag sa Senate Blue Ribbon Committee ang dako nga kontrobersiya sa mga flood control projects human sa pag-angkon sa usa ka kanhing opisyal sa Department of Public Works and Highways (DPWH) atol sa hearing karung Huwebes, Septiyembre 25. Gibutyag ni kanhi DPWH Undersecretary Roberto Bernardo nga siya mismo ang naghatod sa 20 porsyento o P160 milyon gikan sa P800 milyong kantidad sa proyekto ngadto kang Meynardo, nga gituohang duol nga tawo ug campaign contributor ni Senador Francis “Chiz” Escudero.
Giapil usab sa iyang pahayag ang mga pangalan nila kanhing Senador Bong Revilla, kanhing Senador ug karon Makati Mayor Nancy Binay, ug Ako Bicol Party-list Representative Zaldy Co nga giingong nakadawat og kickbacks.
Matod pa ni Bernardo, adunay porsyento nga gi-allocate alang sa pagpondo sa political campaign sa pipila sa maong mga opisyal. Samtang gipanghimakak usab niya ang uban pang pasangil sa iyang kalambigitan sa ubang irregularidad.
Gipangayo karon ni Justice Secretary Jesus Crispin Remulla nga madala si Bernardo ngadto sa Department of Justice aron susihon ang iyang testimonya ilawom sa Witness Protection Program, nga gisuportahan usab sa mga miyembro sa komite.