Gipagawas na sa International Criminal Court o ICC Office of the Prosecutor ang opisyal nga dokumento nga naglangkob sa mga kasong gi-file batok kang kanhi Presidente Rodrigo Duterte.
Ang maong dokumento, nga gitawag og Document Containing the Charges o DCC, gisumite sa Office of the Prosecutor ug nagsilbing basihanan alang sa confirmation of charges hearing nga ipahigayon sa Pre-Trial Chamber sa ICC.
Base sa dokumento, gipangayo sa mga piskal nga patubagon si Duterte sa mosunod nga mga kaso:
Murder isip krimen batok sa katawhan sa Davao City sa panahon nga siya mao pa ang mayor, gikan tuig 2013 hangtod 2016.
murder isip krimen batok sa katawhan nga target ang mga “high value targets” sa nagkalain-laing lugar sa Pilipinas panahon nga siya mao na ang presidente, gikan 2016 hangtod 2017.
murder ug attempted murder crimes against humanity sa mga barangay clearance operations sa tibuok nasod gikan tuig 2016 hangtod 2018.
Gipresentar sa Prosecutor ang 49 ka insidente nga nagsuporta sa mga kaso, diin adunay kinatibuk-ang 78 ka biktima:
19 ka biktima alang sa Count 1,
14 ka biktima sa Count 2, ug
45 ka biktima sa Count 3.
Sumala sa dokumento, si Duterte ang giila nga responsable sa maong mga panghitabo tungod kay siya ang nagmugna, nagpundo, ug nagpahimutang sa mga tawo aron ipatuman ang iyang giingong “giyera kontra droga.”
Gipagawas usab sa Prosecutor ang Pre-Confirmation Brief nga naghatag og detalyado nga mga ebidensya ug legal nga argumento nga nagpalig-on sa kaso batok kang Duterte.
Hinumduman nga nakatakda untang ipahigayon karong adlawa, Setyembre 23, ang confirmation of charges hearing, apan kini gi-postpone tungod sa hangyo sa kampo sa depensa. Gipasabot nga adunay mga isyu sa kahimsog si kanhing presidente, lakip na ang kakulang sa panumduman ug pagpakita og mga timailhan sa pagkaulyanin.