Nakatutok karon ang Philippine Anti Corruption Commission kon (PACC) sa kontrobersyal nga flood control project sa Barangay Linabo syudad sa Malaybalay, Bukidnon. Ang maong proyekto mao ang Construction sa 207 meter Flood Mitigation Structure sa Purok 4 ug Purok 8 nga adunay budget nga ₱96,4 Million.
Base sa dokumento, gi-report nga nahuman kini niadtong Mayo 3, 2024 ug naka kontrata kini sa Ritche Nathalie Development Corporation.Sa gihimong ocular inspection, walay nakita nga ebidensya nga adunay nahimong konstruksyon sa maong lugar. Bisan pa man gi-report nga “completed” na ang proyekto.
Tungod niini, nakig koordinar gilayon ang PACC sa DPWH Region 10 aron magpadala og validation team alang sa ground inspection.Apan base sa pagpanubay sa Bombo Radyo Malaybalay kang Barangay Kapitan Manuel Evangelista iyang gisaysay nga walay Ghost Project nga nahitabo sa iyang barangay kay ang nahitabo kay wala mitugot ang mga taga Purok 8 sa road right of way tungod kay maapektuhan ang ilang kaumahan.
Apan ang gibuhat gi RE ALIGN ang maong proyekto ngadto nasa purok 3 ug adunay legal nga papel isip basihan niini. Bisan pa, nagpabilin ang reklamo sa mga residente.Matud pa ni Wilfredo Ayre, residente sa nahisgutang dapit dili kini kontento sa proyekto kay gamay ra matud pa ang box culvert nga gibutang ug mas nisamot pa ang pagbaha sa lugar imbes nga makontrol kini.
Sa laing bahin matud pa ni Godofredo Codillera, Purok Chairman sa Purok 4, nagkanayon nga kulang pa ang serbisyo sa flood control ilabina nga niadtong miaging mga adlaw adunay pag ulan ug nagbaha ang lugar. Matud pa niini, nag-overflow ang tubig ug sa iyang pagpanubay dili angay nga ang proyekto nagkantidadan og ₱96 milyon tungod kay wala kini klarong epekto sa pagpugong sa baha.Nagpadayon pa ang imbestigasyon sa maong isyu samtang gihulat pa ang resulta sa validation sa DPWH.