Malipayong giselebrar karon sa katawhang Impasugong ang ika-148th nga “Aldaw Ta Impasugong” ubos sa pagdumala ni Mayor Jetaime “Mai-mai” Okinlay.
Taliwala nga aduna lamang P1 milyon nga gi-allocate alang sa maong selebrasyon, nagpadayon gihapon ang makalingaw ug makahuluganong mga kalihukan nga nagpakita panaghiusa ug kadasig sa lungsod.
Gisugdan pinaagi sa Annual Singampo ug Opening Mass, nga gisundan sa Parade of Colors ug Family Caravan diin makita ang aktibong partisipasyon sa nagkalain-laing sektor ug barangay.
Lakip niini ang Festival of Talents, Kid’s Funtasy, ug presentasyon sa Chocolate Factory Band. Sa sektor sa panglawas ug sosyal nga serbisyo, gilaraw usab ang Medical Mission Flores, PSA ug SSS Caravan, Blood Letting Activity, ug awareness drive alang sa World Suicide Prevention Day. Samtang sa sports, aduna usab SMB Impasugong All Star Basketball, Chess Tournament, ug Mobile Legends Tournament.
Usa usab sa labing gihulatan mao ang 30th Rodeo Festival, nga nagpasigarbo sa dungog sa Impasugong isip “Cowboy Capital of the Philippines.”
Usa usab sa highlight sa maong selebrasyon ang Kasalan ng Bayan alang sa mga magtiayon, samtang ang mga tigulang nga nagpakita sa taas nga tuig sa kaminyoon giila pinaagi sa Golden Couple Recognition.
Taliwala nga aduna lamang P1 milyon nga budget nga gigahin alang sa selebrasyon gumikan nakasinati ang lungsod og kalisod sa pinansyal nga nahabiling obligasyon sa miaging administrasyon, padayon ang selebrasyon pinaagi usab sa pakigtimbayayong sa pipila ka mga sector.