Gisilutan og 55 ka tuig nga pagkabilanggo si Janet Lim Napoles human siya mapamatud-ang guilty sa laing kaso kalabot sa pag-abuso sa pork barrel funds ni kanhi Davao del Sur Representative Marc Douglas Cagas IV.
Base sa per curiam decision sa Sandiganbayan Special Third Division nga gimantala niadtong Biyernes, si Napoles napamatud-an nga nakalapas sa duha ka ihap sa Section 3(e) sa Anti-Graft and Corrupt Practices Act ug duha ka ihap sa Malversation of Public Funds ubos sa Article 217 sa Revised Penal Code.
Gimandoan usab siyang mobayad og P7.55 milyon nga multa, nga katugbang sa pondo nga gipagula ni Cagas ug gi-divert ngadto sa mga peke nga proyekto sa iyang mga foundation.
Gipahamtang usab sa korte nga bayaran ni Napoles ang Philippine government og P4.85 milyon nga indemnification, nga may legal interest nga 6% matag tuig sugod sa pinal nga desisyon hangtod mabayran ang tibuok kantidad sa nakawat niini.
Lakip sa napamatud-an nga guilty kauban ni Napoles mao sila si Dennis Cunanan, kanhi deputy director sa Technology Resource Center kon (TRC), Maria Rosalida Lacsamana, kanhi TRC group manager, ug Rhodora Mendoza, kanhi director sa financial management services sa National Agribusiness Corporation.
Ang tulo napamatud-ang guilty sa usa ka ihap sa paglapas sa Section 3(e) sa Anti-Graft and Corrupt Practices Act ug usa ka ihap sa Malversation of Public Funds.
Gipakita sa ebidensya sa korte nga ang PDAF funds ni Cagas gibalhin ngadto sa peke nga mga proyekto diin gipasiugdahan sa mga foundation ni Napoles, nga mao ang People’s Organization for Progress and Development Foundation, Inc. (POPDFI) ug Social Development Program for Farmers Foundation, Inc. (SDPFFI).
Samtang, laing napulo ka opisyal ang wala napamatud-an gumikan sa kakulangan sa ebidensiya, ug walo pa ka tawo ang nagpabiling ginaimbestigahan.