Gibutyag sa PrimeWater Malaybalay nga ang kasamtangang problema sa kakulang sa panubig sa syudad resulta sa padayon nga pagtaas sa demand sa tubig tungod sa nagkadugang konsumedor. Bisan pa man sa mga reklamo sa katawhan giila sa kompanya nga ang pagpasiugda sa mga proyekto nga makatubag sa maong krisis nag-agad pa sa ilang central office.
Sa eksclusibong pakighinabi sa Bombo Radyo Malaybalay ngadto kay Marilyn Maguiran, Branch Manager sa Prime water nga kasamtangan nilang gipasiugda ang mga proyekto nga nakatutok sa pagpalambo sa serbisyo sa tibuok Malaybalay.
Gipasabot niini nga dili tanang lugar sa syudad ang apektado sa putol-putol nga agas, ug aduna pa gihapoy mga barangay nga padayon ang regular nga suplay sa tubig. Sa laing bahin, giaksyonan usab sa maong ahensya ang mga report kabahin sa baho ug kalubog sa tubig ilabi na sa Barangay 4 ug Barangay 8 diin gipatuman karon ang adlaw adlaw nga water quality testing sa maong mga lugar ug gibutyag nga gibutangan na kini og mga tambal aron malikayan ang baho ug mapadayon ang kalimpyo sa suplay sa tubig.
Samtang nagpadayon ang paningkamot sa pagpaayo sa serbisyo, nagpabilin ang tensyon tali sa PrimeWater ug lokal nga panggamhanan human magsugyot ang siyudad sa posibilidad nga tapuson ang joint venture sa kompanya. Wala na magpagawas og pahayag ang PrimeWater kabahin sa isyu ug gisalig na lamang ang tanang diskusyon sa Sangguniang Bayan. Kasamtangang uhaw ang katawhan sa kongkretong solusyon sa dugay nang problema sa suplay sa tubig sa syudad samtang gipaningkamotan sa PrimeWater nga mapadayon ang operasyon ug serbisyo nga angay sa panginahanglan sa publiko.