Nakaplagang wala nay kinabuhi ang usa ka lalaki pasado alas 5:00 sa buntag, ning adlawa, sa Purok 3, Barangay Dalwangan, ning syudad sa Malaybalay.
Base sa nakalap nga impormasyon sa Bombo Radyo Malaybalay, namatikdan ang biktima sa gawas sa panimalay niini apan wala tagda sa mga nakakita gumikan gtuohan nga kini natulog lamang tungod sa kahubog.
Apan, sa dihang gibalikan kini, nasayran nga wala na kini kinabuhi. Giila ang biktima nga si Rene Demonteverde, 32 anyos, minyo, ug residente sa maong dapit.
Matud ni Jeniel G. Ginawat, silingan sa biktima, nga sa wala pa mahitabo ang insidente, nag-uban kini sa biktima kagabie og nag-inom.
Gibutyag ni Ginawat, nga nakahisgut matud pa ang biktima nga nagproblema sa umanakay nga asawa gumikan adunay posibilidad nga macesarean section kini og nabalaka nga maapektuhan ang goiter nini.
Nasayran usab nga anaa pa ang asawa niini sa Camguin ug gikaingong gihangyo sa biktima nga mupauli gumikan manganakay na karong Setyembre.
Samtang, base sa imbestigasyon sa kapulisan, mihunos sa iyang kaugalingon kinabuhi ang biktima.
Apan padayon gihapon ang otoridad sa pagtuki sa dugang nga posibleng hinungdan sa insidente.