Nasikop sa kapulisan ang tulo ka manag-lahi nga most wanted persons sa Bukidnon pinaagi sa coordinated operations nga pinangulohan sa Bukidnon Provincial Police Office.
Unang nadakpan mao si Kneil Depalas Pangan, 30 anyos,ulitawo, walay trabaho ug residente sa La Roxas, Maramag, ning lalawigan, kansang gikaingong Top 1 Most Wanted Person sa Municipal Level. Gidakop kini alas 4:05 sa hapon sa Barangay Wadya sa operasyon sa kapulisan sa Maramag.
Giaresto si Pangan pinasikad sa warrant of arrest alang sa kasong Murder ug Attempted Murder, 2 counts, nga adunay girekomdendang pyansa nga mukantidad sa P60,000.
Ikaduhang nadakpan mao si Jesus Ayoc Japos alyas Yoyoy Japos, 49 anyos, minyo, DOLE worker ug taga Barangay Bugcaon, Lantapan, Bukidnon, kansa giila isip Top 8 Most Wanted Person sa Regional Level.
Nadakpan si Japos sa Purok 5, Barangay Bantuanon, Lantapan pinaagi sa warrant of arrest sa kasong Murder nga walay rekomendadong pyansa. Nadakpan usab si alyas Macky, 30 anyos, minyo, walay trabaho ug residente sa Sitio Laslasakan, Barangay Palma Gil, Talaingod, Davao del Norte.
Ang dinakpan giaresto pinasikad sa warrant of arrest sa kasong Violation of RA 9516 ug Multiple Attempted Murder nga walay rekomendadong piyansa. Gidakop kini alas 3:30 sa hapon sa Barangay 9, Malaybalay City.
Kahinumdoman, nga nasikop ang tulo ka wanted person kagahapong adlawa, Agosto 12, ning tuiga, sa manag lahing lugar sa lalawigan.