Nasamdan ang tulo ka tao human sa insidenteng pagpamusil sa Times Square, New York City niadtong Sabado, Agosto 9. Matud sa New York Police Department, nasayran nga adunay init nga panaglalis tali sa duha ka indibidwal nga miresulta sa pagpamusil.
Ang mga biktima mao ang usa ka 19-anyos nga lalaki nga naigo sa tuo nga tiil, ug usa ka 65-anyos nga lalaki nga naigo sa wala nga bitiis, ug usa ka 18-anyos nga babaye nga naigo sa liog. Ang tanang biktima gidala sa Bellevue Hospital ug anaa na sa luwas nga kahimtang.
Sigon sa mga otoridad, usa ka 17-anyos nga suspek ang nadakpan duol sa West 44th Street ug 7th Avenue, diin nakit-an usab ang pusil nga gigamit sa krimen.
Tungod sa insidente, daghang turista ang nakabati sa kahadlok human madungog ang pagpabuto sa pusil duol sa Hard Rock Café. Mitug-an usab ang mga nakakita sa insidente, nga adunay mga igo sa bala sa bintana sa usa ka sakyanan.