Mitahan sa 89th Infantry Battalion sa Philippine Army ang 4 ka kumander inubanan sa 189 ka myembro sa New People’s Army (NPA) uban ang ilang mga pamilya sa Barangay Butong, Quezon, Bukidnon, kagahapong adlawa, Agosto 8, 2025, dala ang kapin 72 ka nagkadaiyang klase sa armas lakip ang lima ka granada ug usa ka landmine.
Sumala ni Captain Aries Dentista, spokesperson sa 89th Makatao Infantry Battalion, gihimo ang inisyatiba pinaagi sa pakigkoordinasyon sa lokal nga panggamhanan ug kasundalohan subay sa panagsabot tali sa mga buot mosurender ug sa militar.
Apil sa mga misurender ang upat ka commander sa Northern Mindanao Sub-Regional Command nga gikan sa San Fernando, Valencia City, Kibawe ug Quezon.
Si Senador Juan Miguel Zubiri, isip guest speaker, nanguna sa paghatag og tag-P5,000 ug 10 kilos nga bugas matag indibidwal, inubanan sa mainit nga pagdawat sa ilang pagbalik sa sabakan sa balaod. Nanawagan usab si Dentista sa nahabilin pang mga rebelde nga mosugakod sa panaw paingon sa kalinaw ug panaghiusa alang sa kalambuan sa probinsya.